ՄԵՆՅՈՒ

ՊԱՏՄԱՄՇԱԿՈՒԹԱՅԻՆ, ԳՐԱԿԱՆ - ԳԵՂԱՐՎԵՍՏԱԿԱՆ, ՓԱՍՏԱՎԱՎԵՐԱԳՐԱԿԱՆ, ՀԱՆՐԱՄԱՏՉԵԼԻ, ՈՒՍՈՒՑՈՂԱԿԱՆ, ԱԶԳԱՅԻՆ, ՀԱՅՐԵՆԱՍԻՐԱԿԱՆ, ԿՐԹԱԴԱՍՏԻԱՐԱԿՉԱԿԱՆ ԲԼՈԳ   «Բոլորն ուզում են իրենց երեխաներին թողնել լավ աշխարհ, իսկ ես աշխարհին ուզում եմ թողնել լավ երեխաներ» ԿԱՐԼՈՍ ՍԼԻՄ ԷԼՈՒ  
Drop Down MenusCSS Drop Down MenuPure CSS Dropdown Menu

29.06.2013

ԲԱՒԱՐԱՐՈՒԻՐ ՔՈՒ ՈՒՆԵՑԱԾՈՎ

Մեր ընկերութեան յոռի երեւոյթներէն մին կ՛ուզեմ մատնանշել։
* * *
Համաշխարհային տնտեսութիւնը իրենց մենաշնորհը դարձուցած ընտրանին, այնպիսի ձեւերու կը դիմէ ծանուցելու իր արտադրութիւնները եւ զանոնք վերածելու «անհրաժեշտութեան» մը, որ առանց անոնց իբր թէ ապրիլը անհնար է եւ կեանքը անկարելի է շարունակել առանց այդ «բարիք»ներուն։
...Եւ այպէս, երիտասարդներ սկսած են «համակագչային» եւ այլ «ային»ներու կատաղի «մրցումի» ելլել, մէկը միւսին դէմ։
Այսպէս, երբ մէկը տեսնէ, թէ իր բարեկամը կամ ծանօթը գնած է տուեալ մակնիշի ինքնաշարժ մը, բջիջային հեռախօսի գործիք մը կամ այլ արտադրութիւններ, ապա անմիջապէս կ՛երթայ այդ տեսակ առարկաներ ծախող վաճարատուն մը եւ կը պահանջէ իր ընկերոջ ունեցածէն «աւելի լաւ»ը ... եւ արդէն «պայքար»ը սկսած է. ի՞նչ, քու ունեցա՞ծը, ինչ հի՜ն է. ի՞մս, օ՜, լաւագոյնն է եւ ինչ առաւելութիւններ ունի, որ քու բջիջային հեռախօսը չունի, հապա՜։ Հիմա, առաջինը, որուն գործիքը «հի՜ն» էր եւ զուրկ «առաւելութիւն»ներէ, պիտի երթայ վաճարատուն եւ պահանջէ «աւելի՛ լաւ»ը։ Եւ այպէս շարունակաբար։
* * *
Համաշխարհային տնտեսութիւնը տնօրինողները միլիոնաւոր մարդոց ուղեղին մէջ դժբախտաբար կարողացած են «զետեղել» նաեւ այն գաղաբարը (ցնօրք), որ եթէ արդի բջիջային հեռախօս, ինքնաշարժ կամ համակարգիչ չունիս, ապա «մարդ ըլլալու» իրաւունքէն զրկուած ես եւ դատապարտուած ապրելու «մարդկութենէն» հեռու՝ անտառի մէջ՝ ուր բաւական խոկալէ, գրպաններդ պարպելէ եւ «դարձ»ի գալէ ետք, կրկին կրնաս վերադառնալ անոնց բնորոշած «մարդկութեան», որ ամէն բան է, բացի մարդկութենէ։
Նոյնը կը վերաբերի նաեւ փոքրերուն. հոս զարգացուցած են՝ «իմ վրայ կը խնդան»-ի միտքը, այսպէս՝ եթէ ընկերս ունի բջիջային հեռախօս եւ ես չունիմ, ապա կը ծիծաղին իմ վրայ։ Պէտք է ընդունիլ, որ անոնք (ծանուցողները) լաւագոյնը յաջողած են իրենց «առաքելութեան» մէջ. այդ է արդէն իրենց բուն նպատակը։
Զգոյշ պէտք է ըլլալ անոնց քարոզչութենէն, որ կը ձգտին մեզ մղել յաւելեալ եւ անտեղի լումա ծախսելու. անոնք իրենց ապրանքը պիտի ծախեն շուկայական պարզ՝ «պէտք է շահիմ ու միայն շահիմ»-ի մօտեցումով։
* * *
Կը մնայ աւելորդ եւ անտեղի ծախսերով յաւելեալ գումարներ չլեցնել անոնց հաշիւներուն՝ յաչս մեր առօրեայ անհրաժեշտ պէտքերուն։ Խնայենք այդ գումարները եւ ծախսենք իսկապէս անհրաժեշտ առարկաներ գնելու եւ մեր ընտանիքին ու զաւակներուն տրամադրելու դաստիարակչական եւ շինիչ իրեր եւ պէտքեր։
* * *
Ընտանիքին եւ ծնողներուն դերը շատ կարեւոր է եւ շրջադարձային. անոնք պիտի ուղղեն իրենց զաւակները ճիշդ ընտրանք կատարելու եւ հետապնդեն (հետեւին) զանոնք, որպէսզի չիյնան նման ալիքներու մէջ, որ վստահաբար ապագային պիտի հասցնէ տեղ մը, ուր ահագին ծախսերու մէջ իյնալով, երիտասարդը կամ պատանին պիտի դիմեն այլ եւ զարտուղի միջոցներու, գոհացում տալու իրենց պահանջներուն (խաբկանքներուն)։ Անկէ անդին ի՞նչ. պատասխանը ունենալու համար, պարզապէս դիտեցէք ձեր չորս դին եւ կը տեսնէք, թէ ինչ ողբերգական իրավիճակ կը պարզէ մեծ թիւով երիտասրդներու եւ պատանիներու ընկերաբարոյական եւ տնտեսկան կացութիւնը։
* * *
Վանենք մեր մտքերէն մեզ պարտադրուող այս գաղաբարները (իմա՝ ուղեղ բթացնող մտքեր)։ Բարդոյթ չունենանք մեր ունեցածէն ու բաւարարուինք անոնցմով։ Բայց նաեւ առանց մոռնալու, թէ՝ այո, մարդկային արդար բնազդով բոլորս ալ կը ձգտինք լաւագոյնին։
Կ՛արժէ մտածել։
Կիրօ Գարակէօզեան
28 Յունիս 2013
Պէյրութ, Լիբանան

Комментариев нет:

Отправить комментарий

Blogger Widgets