ՄԵՆՅՈՒ

ՊԱՏՄԱՄՇԱԿՈՒԹԱՅԻՆ, ԳՐԱԿԱՆ - ԳԵՂԱՐՎԵՍՏԱԿԱՆ, ՓԱՍՏԱՎԱՎԵՐԱԳՐԱԿԱՆ, ՀԱՆՐԱՄԱՏՉԵԼԻ, ՈՒՍՈՒՑՈՂԱԿԱՆ, ԱԶԳԱՅԻՆ, ՀԱՅՐԵՆԱՍԻՐԱԿԱՆ, ԿՐԹԱԴԱՍՏԻԱՐԱԿՉԱԿԱՆ ԲԼՈԳ   «Բոլորն ուզում են իրենց երեխաներին թողնել լավ աշխարհ, իսկ ես աշխարհին ուզում եմ թողնել լավ երեխաներ» ԿԱՐԼՈՍ ՍԼԻՄ ԷԼՈՒ  
Drop Down MenusCSS Drop Down MenuPure CSS Dropdown Menu

28.02.2014

ԴԷՊԻ ԱՐԵՒՄՏԵԱՆ ՊԷՅՐՈՒԹ, ԱՅՆՏԵՂԷՆ...

Արժեւորումներ
Մասն 2

Այսպէս, շուրջ 15 հոգիներէ կազմուած խումբ մը, օրին անցաւ արեւմտեան Պէյրութ, ուր բաժնուեցաւ 3 մասի. մէկ մասը հաստատուեցաւ Համազգայինի Ճեմարան, երկրորդ խմբակ մը՝ Ս. Նշան եւ Ազգային Առաջնորդարան, իսկ խումբին շուրջ կէսը՝ «Երեւանեան ակումբ», ուրկէ կը ղեկավարուէին խումբին աշխատանքները։ Իւրաքանչիւր խմբակին հետ կը գործէին շրջանի «Քրիստափոր» կոմիտէութեան եւ ԼԵՄի «Փոթորիկ» մասնաճիւղի անդամ ընկերներ։
***
Արեւմտեան Պէյրութի մէջ պահակութեան գացող խումբերու մթնոլորտն ու աշխատանքի պայմանները բոլորովին տարբեր էին այլ շրջաններու պայմաններէն։ Յատկապէս առաջին երկու տարիներուն, լիաժամ զինուորութիւն եւ բանակային կարգապահութիւն կ՛ենթադրուէր ընկերներէն, որոնք օրական 24 ժամ պարտականութեան վրայ մնալու հարց ունէին։ Իւրաքանչիւր ընկեր շաբաթը մէկ անգամ կրնար վերադառնալ տուն՝ 24 ժամուան համար։ Ակումբէն կամ միւս կեդրոններէն կարելի էր դուրս ելլել, երբ ընկերոջ մը կամ անձնաւորութեան մը ընկերանալու հարկ ծագէր, կամ երբ խմբապետը օրական մէկ կամ երկու ընկերոջ առիթ տար ժամուան մը համար դուրս գալու կեդրոնէն եւ քիչ մը շրջագայելու մօտակայ թաղերը, ընդհանրապէս՝ Համրա պողոտային վրայ։ 
Այդ տարիներուն հայութիւնը կ՛ապրէր Հայ Դատի հետապնդման պահանջատիրական "աքթ"երու մթնոլորտի մէջ. 1975ին սկսած զինեալ գործողութիւնները յարաճուն զարգացման մէջ էին եւ իրենց գագաթնակէտին կը մօտենային 1981-1982 տարիներուն։ Յաճախ պատահած ձերբակալութիւններու որպէս արդիւնք ի յայտ կու գային այդ գործողութիւններու մասնակցողներու անուններ, որոնք Լիբանանի մեր ակումբներուն համար անծանօթներ չէին։ Այս "աքթ"երը իրենց բնական ազդեցութենէն քիչ մը աւելին կը գործէին զօրանոցային մթնոլորտի մէջ ապրող այս ընկերներուն վրայ, որոնք իրենց ամբողջ ժամանակը իրարու հետ անցընելով շատ երկար ժամանակ կը տրամադրէին կուսակցական, միութենական եւ յատկապէս Հայ Դատի հետ առնչուած հարցերու քննութեան։
Արեւմտեան Պէյրութի մէջ պահակութեան աշխատանքի գացող խումբերուն առօրեայ մթնոլորտը տարբեր կ՛ըլլար նաեւ այն պատճառով, որ այդ ընկերները առօրեայ շփումի մէջ կ՛ըլլային «Ազդակ»ի, «Դրօշակ»ի եւ «Բագին»ի խմբագրատուներէն, ինչպէս նաեւ Մամլոյ Դիւանի եւ Երիտասարդական Գրասենեակէն ներս զարգացող քննարկումներուն հետ եւ կը հաղորդուէին մտաւորական այն մթնոլորտով, որ օրին այնպիսի եռուն պատկեր մը կը ներկայացնէր, որ հակառակ լիբանանեան տագնապի ծանրութեան, կը յաջողէր ներշնչել ամբողջ Սփիւռքը եւ մտաւորական լիցք կը հասցնէր աշխարհով մէկ տարածուած հայ գաղութներուն եւ յատկապէս մեր շարքերուն ու խումբերուն։
Այս բոլորին վրայ կու գար աւելնալու այն առօրեայ շփումը, զորս այս ընկերները կ՛ունենային պատասխանատու ընկերներու հետ։ Կը պատահէր նաեւ, որ այդ ընկերներու տեղափոխութեանց ընթացքին կամ ժողովական մթնոլորտէ դուրս զրոյցներուն պարտադրաբար ականջալուր կ՛ըլլային ու այդ մէկը բնականաբար կը նպաստէր անոնց մտաւորական ու գաղափարական հասունացման։
Ս. Եարճլեան
ՀԱՅՈՒԹԵԱՆ ԵՒ ԼԻԲԱՆԱՆԻ ՀԱՄԱՐ. Պէյրութ Լիբանան, 2000 թ.

Комментариев нет:

Отправить комментарий

Blogger Widgets