ՄԵՆՅՈՒ

ՊԱՏՄԱՄՇԱԿՈՒԹԱՅԻՆ, ԳՐԱԿԱՆ - ԳԵՂԱՐՎԵՍՏԱԿԱՆ, ՓԱՍՏԱՎԱՎԵՐԱԳՐԱԿԱՆ, ՀԱՆՐԱՄԱՏՉԵԼԻ, ՈՒՍՈՒՑՈՂԱԿԱՆ, ԱԶԳԱՅԻՆ, ՀԱՅՐԵՆԱՍԻՐԱԿԱՆ, ԿՐԹԱԴԱՍՏԻԱՐԱԿՉԱԿԱՆ ԲԼՈԳ   «Բոլորն ուզում են իրենց երեխաներին թողնել լավ աշխարհ, իսկ ես աշխարհին ուզում եմ թողնել լավ երեխաներ» ԿԱՐԼՈՍ ՍԼԻՄ ԷԼՈՒ  
Drop Down MenusCSS Drop Down MenuPure CSS Dropdown Menu

01.03.2014

ԴԷՊԻ ԱՐԵՒՄՏԵԱՆ ՊԷՅՐՈՒԹ, ԱՅՆՏԵՂԷՆ...

Արժեւորումներ
Մասն 3

Վերջապէս, կարելի չէ մոռնալ այն յատուկ մթնոլորտը, որ 1980ականներու սկիզբը կը տիրէր արեւմտեան Պէյրութի մէջ։ Պաղեստինեան Դիմադրութեան ստեղծած մթնոլորտին կողքին ձախակողմեան բազմաթիւ շարժումներու միջեւ բախումները, որոնք մերթ գաղափարական, մերթ զինեալ ձեւ կը ստանային, ազատագրական շարժումներու կողքին կանգնելու տրամադրութիւնները - երբեմն յիրաւի, երբեմն հազար ու մէկ տեսակի այլ նպատակներ հետապնդող, յատուկ բոյր մը տուած էին մեր կեդրոններուն շուրջը տարածուող թաղամասերուն։ Համրայի մայթերն ու Սանայէի պարտէզին շրջակայքը վերածուած էին տեւական ցուցասրահներու, ուր կարելի էր գտնել ամէն տեսակի գիր ու գրականութիւն - Սթալինի վերլուծութիւններէն մինչեւ Չէ Կեւարայի դասախօսութիւններն ու Մարիկելլայի կերիլլայական կռուի տեսութիւնները - չնչին գիներով։
Այս մթնոլորտին մէջ թրծուելու կու գային արեւելեան Պէյրութի զանազան շրջաններուն մէջ այս կամ այն ձեւով քիչ մը աչքի ինկած երիտասարդ ընկերները։
Այսպէս, արեւմտեան Պէյրութ ուղղուող առաջին խումբին մաս կը կազմէր իր քար լռութեամբ յատկանշուող Սիմոն Եահնէեանը։ Ժամանակ մը որպէս պահակ այդ աշխատանքներուն մասնակցելէ ետք, աւելի ուշ ան ստանձնեց խմբապետի պարտականութիւն։ Ան իր կեանքին վերջին երկու տարիներուն մեծագոյն մասը անցուց «Երեւանեան» ակումբէն ներս։
Առաջին խումբը արեւմտեան Պէյրութ մեկնած էր երեք ամիս այնտեղ մնալու հասկացողութեամբ։ Թէեւ առաջին խումբէն շատեր մնացին շատ աւելի երկար, սակայն երկրորդ խումբին հետ միասին «Երեւանեան» ակումբ հասաւ Սարգիս Աբրահամեանը, որ միշտ պատրաստ էր յեղափոխական երգ երգելու կամ պատանիները իր շուրջ հաւաքելով, անոնց հետ որեւէ նիւթի քննարկման սկսելու։

Սարգիս Աբրահամեանը, Լիզպոնի Սագոն, որ արեւմտեան Պէյրութ ամէնէն աւելի երկար մնացողներէն մէկն էր, գիշեր մը, «Ազդակ»ի խմբագրատան մէջ կը մտնէ լոգանքի։ Երբ բաղնիքէն դուրս կու գայ, խմբագրատան պահակ ընկերոջ ձեռքին կը տեսնէ իր ատրճանակը։ Չի հասցներ ըսելու, թէ «փամփուշտը խողովակին մէջն է», երբ դիմացի ընկերոջ ձեռքին մէջ անակնկալ կերպով փամփուշտը կը պայթի։ Սագոն ծանրօրէն կը վիրաւորուի կուրծքէն։ Ընկերները կը հասնին եւ զինք կը փոխադրեն հիւանդանոց՝ փամփուշտը մտած էր կուրծքէն եւ դուրս եկած կռնակէն։ Գործողութեան սեղանին վրայ Սագոն կը սկսի երգել՝ "Կուրծքէն չորս գնդակ ստացաւ...":

Աւելի ուշ արեւմտեան Պէյրութ հասաւ Արա Քըրճըլեանը։ Գիշեր մը, «Երեւանեան» ակումբին առջեւէն սուրացող ինքնաշարժի մը մէջէն հայանուն վարձկաններ ձեռնառումբ մը կը շպրտեն ներս։ Արան թեթեւ վէրք մը կը ստանայ, սակայն կը փափաքի մնալ այնտեղ մինչեւ ամբողջական ապաքինումը, որովհետեւ չէր ուզեր, որ ընտանիքը իմանայ իր ուր գտնուելուն կամ վիրաւորուելուն մասին։
Ս. Եարճլեան
ՀԱՅՈՒԹԵԱՆ ԵՒ ԼԻԲԱՆԱՆԻ ՀԱՄԱՐ. Պէյրութ Լիբանան, 2000 թ.

Комментариев нет:

Отправить комментарий

Blogger Widgets