ՄԵՆՅՈՒ

ՊԱՏՄԱՄՇԱԿՈՒԹԱՅԻՆ, ԳՐԱԿԱՆ - ԳԵՂԱՐՎԵՍՏԱԿԱՆ, ՓԱՍՏԱՎԱՎԵՐԱԳՐԱԿԱՆ, ՀԱՆՐԱՄԱՏՉԵԼԻ, ՈՒՍՈՒՑՈՂԱԿԱՆ, ԱԶԳԱՅԻՆ, ՀԱՅՐԵՆԱՍԻՐԱԿԱՆ, ԿՐԹԱԴԱՍՏԻԱՐԱԿՉԱԿԱՆ ԲԼՈԳ   «Բոլորն ուզում են իրենց երեխաներին թողնել լավ աշխարհ, իսկ ես աշխարհին ուզում եմ թողնել լավ երեխաներ» ԿԱՐԼՈՍ ՍԼԻՄ ԷԼՈՒ  
Drop Down MenusCSS Drop Down MenuPure CSS Dropdown Menu

11.06.15

ՊԱՆԹԵՈՆԻ ԲՆԱԿԻՉՆԵՐԸ: Կոնստանտին Օրբելյան


Հայ կոմպոզիտոր, դիրիժոր Կոնստանտին Օրբելյանը ծնվել է 1928թ. հուլիսի 29-ին Արմավիր քաղաքում: Երաժշտական ունակություններն ի հայտ են եկել դեռ մանուկ հասակում: Շնորհալի փոքրիկին ծնողներն ուղարկել են Բաքվի կոնսերվատորիային կից տաղանդավոր երեխաների համար նախատեսված երաժշտական հատուկ դպրոցը: Դժբախտաբար, նա շատ քիչ է սովորել այնտեղ: Օրբելյանի ծնողները դարձել են ստալինյան արյունալի բռնությունների զոհը: Հորը ձերբակալել են 1936թ., ապա գնդակահարել, իսկ մորը 2 տարի անց ձերբակալել են, ապա ուղարկել ստալինյան ճամբար: Կոնստանտինին հեռացրել են դպրոցից, և եղբայրները մեծ քաղաքից տեղափոխվել են Լեռնային Ղարաբաղի փոքրիկ գյուղերից մեկը:

1942թ. ավիացիոն կորպուսի ջազային խմբում Կոնստանտինին աշխատանքի են ընդունել որպես դաշնակահար: Որոշ ժամանակ անց պատանին ռազմական նվագախմբի հետ միասին համերգներով սկսել է հադես գալ Երևանում: Հայաստանի ջազ երաժիշտներն իրենց համար նոր տաղանդ են բացահայտում այդ համերգների ժամանակ և տղային հրավիրում նվագելու Հայաստանի էստրադային նվագախմբում: Այդ ժամանակ էլ դրվում է Օրբելյան արտիստի ստեղծագործական փայլուն կարիերայի ամուր հիմքը:
1945թ.-ից Օրբելյանն ուժերը փորձում է նաև երգահանության ասպարեզում և բավական լուրջ հաջողություններ է գրանցում: Նվագախմբի համար վերամշակում էր ժողովրդական երգերը, ինչպես նաև ստեղծում նոր մեղեդիներ: Առաջին գործերից է «Օրորոցայինը»: 
Հայազգի մեծանուն կոմպոզիտոր Արամ Խաչատրյանի արվեստը Օրբելյանի համար ուղեցույց է դարձել դեպի երաժշտական մեծ աշխարհ: 1952թ. Օրբելյանը հեռացել է էստրադային նվագախմբից և ընդունվել Ռոմանոս Մելիքյանի անվան երաժշտական ուսումնարան, այնուհետև՝ Երևանի պետական կոնսերվատորիա:
1955թ. հայ կոմպոզիտորը փորձել է ուժերը մեկ այլ ասպարեզում` գրելով «Սիրտը երգում է» ֆիլմի երաժշտությունը, որը մեծ հաջողություն է ունեցել: 1956թ. Օրբելյանը հրավիրվում է ղեկավարելու Հայաստանի էստրադային նվագախումբը: Երկար մտածելուց հետո համաձայնում է` դառնալով խմբի դիրիժորը և գեղարվեստական ղեկավարը: 
1957թ. Օրբելյանը դարձել է ԽՍՀՄ կոմպոզիտորների միության անդամ: 1962թ. Մոսկվայում անցկացվող «ԽՍՀՄ երիտասարդ կոմպոզիտորներ» մրցույթի հաղթող ճանաչվել է Օրբելյանը:
1969թ. գրել է «Անմահություն» բալետը: Օրբելյանի ղեկավարած նվագախումբը համարվում էր լավագույնը Եվրոպայում և առաջինն էր հայտնիների շարքում, որ համերգներով հանդես է եկել ջազի հայրենիք ԱՄՆ-ի ավելի քան 25 խոշոր քաղաքներում: Նրա հայտնի երգերը բազմաթիվ կատարողների ներկայացմամբ արժանացել են մի շարք մրցանակների` «Երգել նշանակում է ապրել», «100 երջանիկ ժամեր», «Շնորհակալություն կյանքին», «Սերը չի ծերանում», «Դու այն չես, ով պետք է ինձ», «Հիշեք» և այլն:
1979թ. ԽՍՀՄ երաժշտական արվեստի զարգացման գործում ունեցած մեծ ավանդի համար Օրբելյանին շնորհվել է ԽՍՀՄ ժողովրդական արտիստի կոչում: 1992թ. Օրբելյանը մեկնել է ԱՄՆ և բնակություն հաստատել այնտեղ:

Մահացել է 2014թ. ապրիլի 24-ին Լոս Անջելես քաղաքում, որտեղ ապրում և ստեղծագործում էր վերջին տարիներին:


Комментариев нет:

Отправить комментарий

Blogger Widgets