ՄԵՆՅՈՒ

ՊԱՏՄԱՄՇԱԿՈՒԹԱՅԻՆ, ԳՐԱԿԱՆ - ԳԵՂԱՐՎԵՍՏԱԿԱՆ, ՓԱՍՏԱՎԱՎԵՐԱԳՐԱԿԱՆ, ՀԱՆՐԱՄԱՏՉԵԼԻ, ՈՒՍՈՒՑՈՂԱԿԱՆ, ԱԶԳԱՅԻՆ, ՀԱՅՐԵՆԱՍԻՐԱԿԱՆ, ԿՐԹԱԴԱՍՏԻԱՐԱԿՉԱԿԱՆ ԲԼՈԳ   «Բոլորն ուզում են իրենց երեխաներին թողնել լավ աշխարհ, իսկ ես աշխարհին ուզում եմ թողնել լավ երեխաներ» ԿԱՐԼՈՍ ՍԼԻՄ ԷԼՈՒ  
Drop Down MenusCSS Drop Down MenuPure CSS Dropdown Menu

24.10.2016

ՉՍՊԱՍՎԱԾ ՆԱՄԱԿ ՀԵՌԱՎՈՐ ԱՓԵՐԻՑ...

Պուէնոս Այրէս՝ Հոկտեմբեր 22, 2016
Միրթա եւ Դանիէլ

Յարգելի Պրն. Նախշքարյան.
Առաջին հերթին կ'ուզէի Կնոջս եւ իմ կողմէ սրտանց շնորհակալութիւնները յայտնել մեր անունին ձօնուած Ձեր երեք հատորները, որոնցմով պատուեցիք մեզի:
Թերեւս կարճ ժամանակէ ի վեր, սակայն քաջատեղեակ ենք Ձեր բազմաճակատ լուրջ ու անխոնջ ազգաշէն պայքարի՝ ըլլայ Ռադիո Մարիամի միջոցաւ, ըլլայ պարբերաբար մեզ հասած Youtube-ի Ձեր հաշիւին ներբեռնած բազում տեսանիւթերու (յատկապէս՝ «Խոսող Գրգեր» թանկագին շարքի թուացեալ ձայնադարանը, որոնցմէ բազում երկեր ատենօք հաղորդած ենք մեր ռադիոժամով):
Կը խոստովանինք որ նախանձելու չափ կը հիանանք Ձեր կորովալի ու եռանդուն կամքի վրայ, ինչ որ այս հեռաւոր ափերու մէջ շատերու համար խիստ դժուար է մշակել ու պահպանել:
Գալով Ձեր գիրքերուն՝ ըսեմ թէ «Լիբանանի Մեկ Օրս» մեզ լոկ յուշագրութիւն մը չի հանդիսանար, այլ նաեւ շատ յարմար ու զորեղ միջոց մը, թէ' մեզի, թէ' նոր սերունդներու լայն ու յստակ գաղափար մը կազմելու մեր «Երկրորդ Հայաստանի» (կամ ընդհանրապես՝ Միջին Արեւելքի) մէջ նստող քոյր-եղբայրներու տարած երկարատեւ պայքարի ու չարքաշ կեանքի մասին: Ոչ պակաս կամ երկրորդական նպատակներու կը հետեւի Ձեր «Դիցարան»-ը, հայու մի նոր, առաքինի, անվախ ու Մայր Հայրենիքին ծառայելու պատրաստ տեսակի իրականացման կոչուած
Սերտօրէն հետեւելով Ձեզ յուզող, հետաքրքրող ու մտահոգիչ հարցերու, ընթերցողը կը համոզուի որ ներկայ ճգնաժամային կացութեան մէջ գտնուող մեր ազգը փրկելու համար հարկաւոր է օր առաջ հայորդիներու հոգիին մէջ մշակել մեր առաւելութիւններն ու արագինութիւնները, վերականգնել մեր ազգային հպարտութիւնը հոգեկան անսասան արժէքներու ու հայ ինքնութեան ու պատկանելիութեան ամրապնդման միջոցավ: Նոյնիսկ՝ խելացիօրէն հին ու արդի պատմութեան դասերը գաղելով, վերլուծելով եւ իւրացնելով, արդարացնելու համար անհամար (իմացեալ կամ ոչ) զոհերու պայքարը:
Որքա՜ն լաւ ու օգտակար կ'ըլլար եթէ Ձեր ուխտագնացութիւնը դէպ ի Լիբանան օրինակ հանդիսանար մեր աշխարհատարած հայրենակիցներուն եւ գոնէ մէկ անգամ իրենց (հաճախ թեթեւ զուարճութեամբ ու անօգուտ զբոսաշրջութեամբ յատկացուած) ժամանակն ու նիւթականը տրամադրէին ու ճամբորդէին մեր սրբավայրերը, օրհնուելու ու հայեցիօրէն ներշնջուելու, ու վերադարձին՝ խումբ խումբ ազգաշէն գործունէութեամբ զբաղուէին: Մեզ մօտ, եւ ընդհանրապէս բազում աշխարհատարած հայ գաղթօճախներու մէջ այնքա՜ն նիւթական, մտային ու հոգեկան ուժ կը մսխուի յանուն թեթեւակեացութեան, օտարամոլութեան, աթոռապաշտութեան...
Մեր նամակը աւարտելէ առաջ, կ'ուզէինք մեր շնորհաւորական ու գնահատական խօսքը հասցնել բոլոր այն անձանց, որոնք ըմբռնելով Ձեր ազգաշէն առաքելութիւնը, իրենց կարողութեան համեմատ, զօրավիգ կանգնած են իրականացնելու Ձեր ծրագիրները, այս պարագային յատկապէս մեկենասներուն ու բարեհաճ աշխատակիցներուն: Վստահ եղէք որ թէ Միրթան իր ծարայած երկու դպրոցներու մէջ, ինչպես ես, կ'աշխատինք ո'չ միայն երեք գիրքերը ծանօթացնել եւ տարածել աշակերտներուն եւ ուսուցչական կազմերուն՝ այլ նաեւ մեր գաղութային ու բարեկամներու շրջանակին մէջ: Նոյնիսկ յոյս ունինք որ երբ տեղւոյս տնտեսական տագնապը աւարտի, եւ քիչ մըն ալ ընդհանուր վիճակը բարելաւուի՝ կրկին էթէր կը բարձրացնենք մեր «Հազարաթեւ Հայաստանը» մշակութային ռատիոժամը, ուր լայն տեղ պիտի տրուի Ձեր վաստակած ձայնային արտադրութիւններուն, եւ եթէ արհեստական սարքաւորումները արտօնէն՝ սիրով պիտի հրաւիրենք Ձեզ զրուցելու հայութեան հետաքրքրող հարցերու շուրջ: Այս վերջինս՝ եթէ Կիւմրիի Ձեր նոր քաղաքական զբաղումները թոյլ կու տան: Վստահ ենք որ Կիւմրեցիք թէ՛ ըմբռնած, թէ՛ ընդունած են Ձեր առաջարկները, որ յայտնի է՝ կու գան ազնիւ ու համեստ ազգային գործիչէ մը, պատրաստ ծառայելու ամէն տեսակէտէն, ի շահ բոլոր համայնքին:
Բոլոր իմացեալ մահուամբ անմահացած մեր հերոսներու կեանքը Ձեզ եւ Ձեր ընտանիքի անդամներուն՝ յարգելի Արա: Թող նոր սերունդները օրինակ առնեն մեր արդի ու պատմական երեւելի մշակութային ու ազգային գործիչներէն, եւ իրենց հերթին՝ թէ՛ մեր ոսոխներուն, թէ՛ ողջ աշխարհին իրենց ըսելիքը ըսեն (կը սիրեմ ըսել. հայերէնով՝ աւելի լաւ):
Կը նորոգենք մեր յաջողութեան, քաջառողջութեան ու երջանկութեան մաղթանքները: Թող Ձեր գրիչը միշտ թաց մնայ ու Տէրը միշտ Ձեր ճամբան լուսաւորէ ու խոջընդոտներէ ազատ պահէ:

Մնանք Խորին Յարգանօք՝
Միրթա եւ Դանիէլ

Комментариев нет:

Отправить комментарий

Blogger Widgets